Basketball

Basketball isch e Ballsportart, wo mäistens in dr Halle gspiilt wird vo zwäi Mannschafte, wo brobiere, d Balle in dr Chorb vom Gegner z wärfe. D Chörb befinde sich in de Middene vo de bäide schmale Site vom Spiilfäld und si 3,05 Meter hooch. E Mannschaft bestoot us fümf Fäldspiiler und bis zu siibe Spiiler zum Uswäggsle. Dr Dreener cha jeede Spiiler so mänggisch wien er will uswäggsle. Wenn dr Chorb us em Spiil uuse droffe wird, git das, je noch däm wie wit dr Spiiler bim Gheije vom Chorb äwäg gsi isch, zwäi oder drei Pünkt. Für e glungnige Freiwurf git s äi Punkt. D Mannschaft mit de mäiste Pünkt gwünnt s Spiil.

Basketball isch im Joor 1891 vom kanadische Dreener James Naismith as Hallesport erfunde worde. Sit 1936 isch d Sportart olümpisch. Hüte isch Basketball uf dr ganze Wälz populär, bsundrigs in de USA, China und Südeuropa. Alli vier Joor findet im ene andere Land d Basketball-Wältmäisterschaft statt, wo vom Wältbasketballverband FIBA veraastaltet wird.

Noch dr FIBA spiile öbbe 450 Millione Mensche uf dr ganze Wält Basketball.^[1] Die erfolgriichste Basketballspiiler ghööre internazional zu de bestzaalte Profisportler. Zu de bekannteste Spiiler us dr NBA ghöre dr Kobe Bryant, dr LeBron James, dr Magic Johnson, dr Shaquille O'Neal und dr dütschi Spiiler Dirk Nowitzki.

1. ↑ FIBA: Presentation: Quick facts, abgrüeft am 25. Juli 2010.