Blut

S Bluet (lat. sanguis, griech. αἷμα haima) isch e Körperflüssikäit, wo mit Hilf vom Härz-Kräislauf-Süsteem und sine vilfältige Dransport- und Verchnüpfigsfunkzione es de verschidnige Körpergwääb mööglig macht z funkzioniere. S Bluet wird as „flüssigs Gwääb“ bezäichnet, mänggisch au as „flüssigs Organ“.

S Bluet bestoot us spezielle Zälle und us em proteinriiche Bluetplasma, wo im Bluetkräislaufsüsteem die Zälle im Körper umedransbordiert, und wird vom Härz mechanisch dur d Bluetgfääss dur e ganz Körper bumpt. Unterstützt wird s Härz dur d Venenklappe und d Aarbet vo Muskle. D Gfääss, wo vom Härz wägfüere wärde as Arterie bezäichnet und die, wo zrugg zum Härz gönge, as Weene. Im Gfäässsüsteem vom ene erwaggsene menschlige Körper het s öbbe 70 bis 80 ml Bluet pro kg Körpergwicht, das entspricht öbbe 5 bis 6 l Bluet im ganze Körper. Im Durchschnitt häi d Manne öbbe 1 l mee Bluet as d Fraue, was vor allem drvo chunnt, ass si grösser und schweerer si.