Diokletian

Dr Diokletian (* zwüsche 236 und 245 z Dalmazie; † um 312 z Spalatum) isch vo 284 bis 305 römische Kaiser gsi. Mit sinere Droonbestiigig foot die Diokletiaanischi Eera aa. Bivoor er Chaiser woren isch, hett er Diokles (altgriechisch Διοκλῆς) ghaisse. As Chaiser hett er mit em volle Name Gaius Aurelius Valerius Diocletianus;^[1] ghaisse.

Dr Diokletian het Reforme iigläitet, wo d Kriise vom 3. Joorhundert im Röömische Riich mit iire Soldaatekaiser beändet het. Die wichdigste Reforme si im Beriich vo dr Verwaltig duuregfüert worde, drunder en umfangriichi Reform vom Browinzialwääse. Dr Diokletian het s Herschaftsmodäll vo dr Tetrarchii iigfüert. Wäge deene Reforme isch d Bürokratisierig gwaggse, und das isch d Entwigglig wääred dr ganze rästlige Spootantike bliibe und isch sogar no sterker worde. S tetrarchische Süsteem isch aber scho bald noch im Diokletian sinere Abdankig zsämmebroche.

Mit dr Regierigszit vom Diokletian verbindet die althistorischi Forschig wäge sim umfassende Reformwärk, wo dr Konstantin fortgsetzt und volländet het, dradizionell en Iischnitt: D Epoche vom Prinzipat isch ume gsi und d Spootantike het aagfange.

1. ↑ Zum inoffizielle Praenome Marcus vgl. L’Année épigraphique 1965, 315: Αύτοκράτορα Καίσαρα Μᾶρκον Αύρήλιον Γάϊον Ούαλέριον Διοκλητιανόν Εύσεβῆ Εύτυχῆ Σεβαστόν.