Domitian

Dr Domiziaan (* 24. Oktober 51 z Room; † 18. Septämber 96 z Room) isch vom 14. Septämber 81 bis zu sim Dood dr röömisch Kaiser gsi. Er isch dr Noochfolger vo sim Brueder Titus gsi und dr dritt und letzt Herrscher us em Gschlächt vo de Flavier. Si vollständig Geburtsnaame isch Titus Flavius Domitianus; as Kaiser het er dr Naame Imperator Caesar Domitianus Augustus brucht.

Dr Domiziaan isch in dr Gschichtsschriibig, wo dradizionell vo Senatoore verfasst worde isch, as schlächte Princeps und Türann (pessimus princeps) daargstellt, wil er weenig Respäkt vor em Senaat ghaa het und Entschäidige droffe het, ooni d Senatoore z konsultiere. Noch sim Dood isch si Sälbstdaarstellig as Kaiser offiziell usglöscht worde und dr Tacitus, dr Plinius dr Jünger und dr Sueton häi en so schlächt gmacht wie mööglig. Erst die modärni Forschig vom Ändi vom 20. Joorhundert aa het s Bild vom Domiziaan rewidiert. Sini milidäärische Erfolg in Germaanie und Pannoonie und sini Finanz- und Browinzpolitik zäichne e Bild vom e fähige Autokraat. Aber si Persöönlikäit und Herrschaftsuffassig blibe zum Däil unerkläärlig.

Gege s Ändi vo sinere Herschaft isch er immer paranoider worde, bis sini änste Berooter Angst überchoo häi und iin am 18. Septämber 96 in ere Verschwöörig umbrocht häi. No am gliiche Daag isch dr Senatoor Nerva zum Kaiser erhoobe worde.