Gemeinfreiheit

Dialäkt: Züridütsch (See)
Inoffiziells Logo, wo gemeinfreis Material kennzeichnet

Es Werch isch gemeinfrei (engl. public domain), wenns keim Urheberrecht underliit.

Alli Werch, wo persönlichi geischtigi Schöpfige sind, underlieged em Urheberrecht. Dezue ghöred insbesunderi literarischi, künschtlerischi, aber au wüsseschaftlichi Arbete und sit einiger Ziit au Software. Entschprechendi Rechtsvorschrifte nenned e Ablauffrischt für de zuegschtandeni Schutz (Schutzduur).

In Düütschland und in Öschterriich isch en Totalverzicht uf s Urheberrecht – öppe zugunschte vo dr Allgemeinheit – nöd möglich (das wird us § 29 UrhG [D] bzw. § 19 UrhG [Ö] abgleitet). Daher gits deet au kei Public Domain dur Rechteverzicht wie i de USA, wo uf alli Recht verzichtet werde chann und s Public-Domain-Werch de gliichi Schtatus wie es nümme gschützts Werch besitzt. Es isch allerdings möglich, s Werch under eme sellige Nutzigsrecht zur Verfüegig z schtelle, sodass es vo jedermann frei veränderbar isch.

Gemeinfreiheit bezieht sich immer uf di jeweiligi nationali Rechtsordnig, und zwar sowohl dere vom Urheber als au dere vom Nutzer. So sind öppe Fotos vo US-Regierigsbehörde, wo i de USA keim Copyright underlieged, in Düütschland sehr wohl urheberrechtlich gschützt.


From Wikipedia, the free encyclopedia · View on Wikipedia

Developed by Nelliwinne