Interslaawsche Spraak

Interslaawsch (ok Interslaavsch) is ene slaawsche Plaanspraak, de in't Johr 2006 ünner den Naam Slovianski vun ene Grupp vun Slawisten ut mehrere Länner begonnen un siet 2017 ünner Leid vun den nedderlandschen Spraakwetenschopper un Översetter Jan van Steenbergen un den Tschechschen Informatiker Vojtěch Merunka utarbeidt is. Dat Teel vun de Spraak is de Kommunikatschon twüschen Sprekers vun ünnerscheedliche slaawsche Spraken lichter to maken un Lüüd, de noch kene slaawsche Spraak snackt, de Mööglichkeit to geven mit Slawen to kommunizeren. Sowohl de Grammatik as ok dat Vokabular baseert vullstännig op de Gemeensamkeiten twüschen de slaawschen Spraken, sünnerlich ok op dat Oolt-Karkenslaawsch. De Entwicklers vun de Spraak gaht dorvun ut, dat 90 % vun de Slawen Interslaawsch verstahn köönt ahn dat lehrt to hebben. De Spraak warrt sowoll in de latiensche as ok in de kyrillische Schrift schreven. Siet 2017 gifft dat ene wetenschopliche Tietschrift, Slovjani, de deelwies op Interslaawsch verfaat is. In 2019 worr dat Interslaawsch benütt in den tschechschen Speelbaas Václav Marhoul sien Film The Painted Bird, worin naamhafte Schauspelers as to'n Bispeel Harvey Keitel, Udo Kier un Stellan Skarsgård mitspeelt.In August 2021 hett de Spraak en Grupp op Facebook mit över 15.000 Liddmaten.


From Wikipedia, the free encyclopedia · View on Wikipedia

Developed by Nelliwinne