Komnenen

D Komnene (griechisch Komnenos, Plural Komnenoi, wiibligi Form Komnena) si en Aadelsdünastii im Byzantinische Riich gsi. Si häi vo 1057 bis 1059 und denn vo 1081 bis 1185 as Kaiser z Byzanz gherrscht, und vo 1204 bis 1461 as Großkomnene (Μέγας Κομνηνός) im Kaiserriich Trapezunt.

D Komnene si en Offiziersfamilie gsi, wo us em Dorf Komne gstammt häi (mä wäiss nit wo s gsi isch: eventuell z Thrakie, woorschiinliger aber z Chläiasie). Si häi sich z Paflagonie niidergloo und si sit dr Zit vom Kaiser Basileios II. Groossgrundbsitzer gsi. Under iirer Herrschaft si uf dr äinte Site d Wirtschaft und d Verwaltig vom Land verfalle, uf dr andere Site het d Kultur e Blüetezit erläbt. D Bewärtig vo dr Komneneherrschaft isch in dr Forschig dorum ambivalänt.