Kuschana

D Kuschana häi zwüsche 100 und 250 n. d. Z. (gnau wäiss mä s nit) über e Riich in Zentralasie und Nordindie gherrscht. Wo s am grösste gsi isch, isch s öbbe vom Gebiet vom hütige Staat Tadschikistan zum Kaspische Meer gange und vom Gebiet vom hütige Afghanistan bis aabe ins Indusdaal und s Ganges-Yamuna-Zwäistroomland. S Riich isch vo Abkömmling vo de Yuezhi us dr hütige chinesische Browinz Gansu gründet worde. Es het diplomatischi Kontakt mit em Römische Riich, em sassanidische Persie und em Kaiserriich China ghaa.

Under em Groossköönig Kanischka, wo möögligerwiis vom Joor 100 bis 126 regiert het und erfolgriichi Erooberigszüüg in d Länder vo de Noochbere gmacht het, isch s Riich vo Benares über Kaschmir und Baktrie bis an Oxus und im Süde bis in Sindh gange. Dr Staat isch uf sim Höhepunkt gsi, und si Kultur brägt gsi vo iranische, indische und hellenistische Iiflüss.