10 results found for: “Facebook”.

Main result

Facebook

Facebook, Inc. adalah sabuting layanan jajaring susial bakantur pusat di Menlo Park, California, Amerika Serikat nang dikaluarakan pas bulan Pibuari 2004. Hingga September 2012, Facebook ba'isi labih matan satu miliar pamakai aktip, labih matan satangahnya mamakai talipun ganggam. Pamakai musti mandaptar sabalum kawa mamakai situs ngini. Imbah ngitu, pamakai kawa ma'ulah pamarung paribadi, manambahakan pamakai lain sabagai kawal, wan bahurup pasan, tamasuk pambaritahuan utumatis pas bubuhannya mahanyari pamarungnya. Lain pada ngitu, pamakai kawa bagabung lawan grup pamakai nang ba'isi hal nang sama-sama dikatuju'i, diurutakan badasarakan tampat bagawi, sakulah atawa paguruan tinggi, atawa ciri has lainnya, wan mangalumpukakan kakawalan bubuhannya ka dalam daptar nang kaya "Kawan Bagawi" atawa "Kawan Parak". Facebook didiri'akan ulih Mark Zuckerberg lawan kawal sakamarnya wan sasama mahasiswa Universitas Harvard, Eduardo Saverin, Andrew McCollum, Dustin Moskovitz, wan Chris Hughes. Kaanggutaan situs wib ngini pamulaannya tabatas gasan mahasiswa Harvard haja, imbah ngitu diligari ka paguruan lain di Boston, Ivy League, wan Universitas Stanford. Situs ngini sadikit-sadikit mambuka diri ka mahasiswa di unipirsitas lain sabalum dibuka gasan siswa sakulah manangah atas, wan paampihannya kawa gasan sabarataan urang nang ba'umur pangurangnya 13 tahun. Biar kaya ngitu, manurut surpai Consumer Reports bulan Mai 2011, ada 7,5 juta kakanakan di bawah umur 13 tahun nang ba'isi akun Facebook wan 5 juta lainnya di bawah 10 tahun, nang jadinya malanggar pasaratan layanan situs ngini. Satudi Compete.com bulan Januari 2009 ma'andak Facebook sabagai layanan jajaring susial nang pambanyaknya dipakai manurut jumlah pamakai aktip bulanan di sabarataan dunia. Entertainment Weekly ma'andak Facebook di daptar "tabaik" pa'uncitan dasawarsa lawan kumintar, "Nang kaya apa caranya kita manilik mantan pacar kita, ma'ingat ulang tahun kawal bagawi kita, mahaur kawal kita, wan main Scrabulous sabalum Facebook di'ulah?" Quantcast mangira'akan Facebook ba'isi 138,9 juta pa'ilang bulanan di AS wayah bulan Mai 2011. Ujar Social Media Today wayah April 2010, kikira 41,6% panggana Amirika Sarikat ba'isi akun Facebook. Biar kaya ngitu, patumbuhan pasar Facebook bamula turun di sapalihan wilayah lawan hilangnya 7 juta pamakai aktip di Amirika Sarikat wan Kanada pas Mai 2011. Ngaran layanan ngini ba'asal matan ngaran buku nang dibari ka mahasiswa pas tahun akadamik panambaian ulih sapalihan pihak administrasi unipirsitas di Amirika Sarikat lawan tujuan manggani'i mahasiswa sakira kanal sa'ikung sama lain. Facebook mambada'i saban urang ba'umur pangurangnya 13 tahun jadi pamakai tadaptar di situs ngini.