Eizelle

D Äizälle (latiin. ovum, Meerzaal: ova) oder Oocyte (gr. Oos, Äi; altgriech. κύτος kytos ‚Zälle‘) isch die wiibligi Käimzälle vo zwäigschlächtlige Lääbewääse. Si isch Däil vo dr generative Vermeerig dur Oogamii und enthaltet alli genetische Aalaage vom wiiblige Lääbewääse, wo an d Noochkomme witergee wärde. D Äizälle si haploidi Zälle, das häisst si enthalte nume äi Satz vo Chromosome.

Wääred dr männlig Gamet, z. B. s Spermium, nume Kärn-DNA bi dr Bildig vo dr Zygote biistüürt, liiferet d Äizälle mäistens die allgemäini zelluläri Umgääbig wie s Cytoplasma und d Organelle, wo sich din befinde.

In de Mitochondrie und bi Pflanze au in de Plastid het s ebefalls DNA, wo mäistens nume vo dr Mueter vererbt wird.

Bi Pflanze reedet mä nid vo Äizälle, sondern vo wiiblige Gamete. Si si mäistens wie d Äizälle vo de Dier wääsentlig gröösser as die männlige Käimzälle.

Vilmol brucht mä s Wort Äi für d Äizälle. So säit mä Äiläiter, Äisprung usw. Gnau gnoo isch en Äi aber s früeje Stadium vo dr sälbständige Furtentwigglig (Ontogenii) vom ene Ovipar, eme Dier wo Äier läit. Es enthaltet näben dr Äizälle Näärstoff und e Schaale, wo s ganze Äi schützt.