George W. Bush

George Walker Bush (* 6. Juli 1946 z New Haven, Connecticut) isch vo 2001 bis 2009 dr 43. Präsident vu de Vereinigte Staate vu Amerika gsi. Er het bi de amerikanische Präsidentschaftswaahle im 2000 für die Republikanischi Bardei kandidiert und isch zum Präsident gwählt worde und isch am 20. Januar 2001 iigämtert worde. Er hett d Präsidentschaftswaahl im 2004 geg dr John Kerry gwunne. Drvor isch er dr 46. Guvanör vu Texas im Zytruum vum 1995 bis 2000 gsi. Er isch dr ältischt Sohn vum ehemalige amerikanische Präsident George H. W. Bush.

Im Bush sinere Amtszit si d Terroraaschleeg vom 11. Septämber 2001 bassiert. Druf het dr Präsident im Raame vom «Chrieg gegen e Terrorismus» Chrieg in Afghanistan und Irak gfüert. Dr Hurrikan Katrina het im Joor 2005 New Orleans verwüestet und 2007 isch e Finanzkriise usbroche, wo sich us ere amerikanische Immobiliekriise zun ere globaale Wirtschaftskriise entwicklet het.