Panhellenische Spiele

Die Panhellenische Spiil (altgriech. πανελλήνιοι ἀγῶνες m.Pl., panellēnoi agōnes) si gsamtgriechischi Wettkämpf zu Eeren vo de griechische Götter gsi und si an religiöse Kultstette abghalte worde. Ursprünglig si s Wettkämpf vo Chrieger in voller Chriegsmontur gsi. Spööter häi blutt kämpft mit Usnaam vom Waffelauf. Im Raame vo de religiös-sportlige Veraastaltige het s au kulturelli Wettkämpf im Dichde und Muusig mache gee.

Zu de panhellenische Spiil wärde die überregionale Wettkämpf an vier Kultstette zelt: Olympia, Delphi, Korinth und Nemea. D Siiger us deene Wettkämpf häi ortsspezifischi Uszäichnige überchoo: Chränz, Zwiig oder Stängel. Die mäiste Spiil si alli vier Joor abghalte worde, die andere alli zwäi Joor. Dr Zit zwüsche zwäi Wettkämpf het mä Periodos (Umlauf, Widercheer) gsäit. E Wettkämpfer, wo wäärend ere Olympiade (Vierjooreszüklus) in ere Sportart in alle vier Hauptkampfstette gwunne het, het dr Ditel Periodonike überchoo.