Spanische Sproch

Spanisch is a romanische Sproch, de in Spanien entschaundn is, zu de iberoromanischn Sprochn ghead, in 23 Lenda ofizieje Aumtssproch is, oane fu de sechs Sprochn fu da UNO is und umarah fu 570 Milliona Leit auf da Wöd ois Muadasproch und nu ziaka fu 88 Milliona ois Zwoat- oda Fremdsproch (gschätzt) beheascht wiad. Spanisch wiad haptsechlich in Spanien und Lateinamerika gret, owa a fü in de USA und a weng auf de Philippinen und in Equatorialguinea in Afrika.

Spanisch is noch Mandarin-Kinäsisch de Sproch auf da Wöd mid de zwoatmaistn muadasprochlichn Schbrecha, nu mea wia Englisch (wai fia de maistn Inda, wo Englisch a ofiziele Amtssproch is, des ned eana Muadasproch is). Waun ma ole muadasprochlichn Sprecha und Leit, de a Sproch ois Zwoat- oda Fremdsproch kinan, zamzöd, dann is Spanisch de drittgresde Sproch auf da Wöd, noch Mandarin-Kinäsisch und Englisch. Spanisch wiad a gean ois Fremdsproch gleant.

Des Woat Spanisch spricht ma auf Boarisch mid SCH und woachn B aus, egal wia ma's schreibt. Boarisch hoast auf Spanisch "el idioma bávaro" oda oafoch "bávaro". Minga hoast auf Spanisch fei ned "Monaco di Baviera" wia auf italienisch sondan "Múnich" (Munitsch). Wean hoast "Viena" und Soizburg "Salzburgo". Sunst gibt's koane Exdra-Nama fia Oatschoftn bai uns. Sidtiroula Oate wean auf spanisch mid de italienischn Nama ausgsprocha.