Matro Teresa

Matro Teresa de Kalkuta
Okupeso:	monakino katolika
Lando:	Albania
Naskodato:	26 di agosto 1910
Nasko-loko:	Skopje, Otoman imperio
Mortodato:	5 di septembro 1997
Morto-loko:	Kolkata, India
Retoloko:	https://motherteresa.org

Matro Teresa, konocata en la katolika eklezio kom Santa Teresa di Kalkuta (naskinta kom Anjezë Gonxhe Bojaxhiu; 26 agosto 1910 - 5 septembro 1997), esis Albanian-Indiana katolika monakino e misionero.

El naskis en Skopje (nun la chefurbo di Norda Macedonia), lore parto di la Vilayet di Kosovo dil Otoman-Imperio. Pos habitar Macedonia dum dek-e-ok yari el translojis ad Irlando e pose ad India, ube el habitis dum granda parto di sua vivo.

En 1950 Teresa fondis la Misioneri di Karitato, katolika religiala kongregaciono qua havis plu kam 4.500 fratini ed esis aktiva en 133 landi en 2012. La kongregaciono jeras hemi por homi mortanta pro HIV/AIDS, lepro e tuberkloso; supo-koqueyi; dispensarii e movebla kliniki; konsilo-programi por pueri e familii; orfanerii e skoli. Membri, qui vovas chasteso, povreso ed obedio, anke profesas quaresma vovo: "totkordie gratuite servar le maxim povra".

Teresa recevis plura honori, inkluzanta la Ramon Magsaysay-Paco-Premio en 1962 e la Nobel-Paco-Premio en 1979. El kanonizesis (agnoskesis dal eklezio kom santo) ye 4ma septembro 2016, e l'aniversario di elua morto (5ma septembro) esas elua festo-dio.

Kontroversala figuro dum elua vivo e pos elua morto, Teresa admiresis da multi pro elua karitatala laboro. El laudesis e kritikesis pro elua opozo kontre aborto, e kritikesis pro mala standi en elua domi por mortanti. Elua oficala biografio skribesis da Navin Chawla ed editesis en 1992, ed el esas la temo di filmi ed altra libri.