Piemont

Piemont
Pais	Italia
Lenghe	italian, piemontèis, ossitan, arpitan, walser, fransèis
Provinse	8: Sità metropolitan-a 'd Turin, Coni, Ast, Lissandria, Biela, Vërsej, Noara, Verban-Cusi-Òssola
Capital	Turin
Popolassion  - total  - densità	4 401 983 ab. (Magg 2013) 173,29 ab./km²
Surfassa  - total	25 402 km²
Comun-e	1206
Pressident	Alberto Cirio

Ël Piemont (Piemont ëdcò an ossitan, franch-provensal; Piémont an fransèis, Piemonte an italian) a l'é na region dl'Italia. A l'é stàit na nassion e në stat indipendent fin-a al 17 ëd mars dël 1861, quand che, dòp ël process d'unificassion, a l'é stàit proclamà ël Regn d'Italia, dont a l'ha fàit part fin dal prinsipi. Àor ël Piemont a l'é na region aministrativa a statù ordinari dla Repùblica italian-a. Soa capital a l'é Turin. Ël Piemont a l'é la sconda region pì granda d'Italia, con na surfassa ëd 25.399 km². A l'é la sesta region pì popolà, la quarta region pì esportatris, con na còta dël 10% dj'esportassion italian-e. A l'é la region nùmer sinch për prodot interior concc con anviron 123 bilion d'Euro totaj e 27.700 € a testa dël 2011. A confin-a con Savòja e Provensa a òvest, con Liguria a sud, con Lombardìa a est e pr'ën curt tòch ëdcò con Emilia-Romagna e a nòrd con la Svìssera (Canton Valèis e Canton Tesin) e Val d'Osta. A conta 4.462.828 abitant. Ël Piemont a fa part ëd l'Euroregion Alp-Mediterani.