Back Куба Abkhazian Kuba ACE Kuba Afrikaans Kuba ALS ኩባ Amharic Cuba AMI Cuba AN Cūba ANG क्यूबा ANP كوبا Arabic
.jpg)
.svg)
Cuba[11], oficialmente República de Cuba, ye un país d'América asitiáu nun archipiélagu del Mar de les Antilles, tamién conocíu como Mar Caribe. Ye ún de los trece estaos independientes asitiaos nel mar Caribe, y ún de los 35 del continente americanu. El so territoriu organízase en quince provincies y un conceyu especial, siendo L'Habana la so capital y ciudá más poblada. Formen l'archipiélagu la islla homónima, la islla de la Juventud y más de mil isllotes qu'arrodien a dambes.
L'archipiélagu, allugáu nel estremu noroeste de les Antilles, llenda al norte col océanu Atlánticu, que lu separta d'Estaos Xuníos y Les Bahames, al este col Pasu de los Vientos, que lu separta d'Haití, al sur col mar Caribe y al noroeste col golfu de Méxicu. Ye, colos sos 11.616.000 habitantes, el país antillanu más pobláu, y tamién el más estensu, con 110.860 km² de superficie. La islla de Cuba ye, xunto coles de La Española, Xamaica y Puertu Ricu, una de les cuatro Antilles Mayores.
La islla de Cuba foi habitada polos siboney, una de les tribus de los taíno, dende'l IV Mileniu e.C. hasta la colonización española nel sieglu XV. De magar, el país foi una colonia española hasta 1869, y una provincia hasta la Guerra d'España y Estaos Xuníos de 1898, que finó cola ocupación de la islla polos Estaos Xuníos. La islla consiguió la independencia nominal en 1902, magar que convirtióse nun protectoráu d'Estaos Xuníos de facto. La fráxil república tentó de reforciar, en 1940, la so estructura democrática, pero la creciente radicalización política y la conflictividá social culminaron nún golpe d'estáu en 1952, que convirtió a Fulgencio Batista nel nuevu presidente, dictatorial, del país. La opresión y la corrupción del so réxime provocó un descontentu que cristalizó na aparición del Movimientu 26 de Xunetu, que llegó al poder en xineru de 1959 y estableció, dempués, un réxime comunista dirixíu por Fidel Castro. De magar 1965 el país tien sío gobernáu pol Partíu Comunista de Cuba. Esto convirtiólu, demientres la Guerra Fría, nún motivu de tensiones ente Estaos Xuníos y la Xunión Soviética, qu'algamaron el so cumal en 1962, cuando la crisis de los misiles en Cuba tuvo a punto de provocar una guerra nuclear.
El país ye un estáu marxista-leninista, con un sistema políticu de partíu únicu dirixíu pol Partíu Comunista de Cuba, que ha guiar al país por mandatu constitucional. Cuba ye un país en víes de desarrollu d'economía planificada, qu'esporta materies primes (zucre, tabacu, café), productos farmacéuticos y profesionales especializaos, principalmente médicos, informáticos, inxenieros agrícoles y biotecnólogos. El país ocupa'l puestu 58ᵘ nel llistáu del Índiz de Desarrollu Humanu de les Naciones Xuníes, y el sestu ente los d'América Llatina. Acordies colos datos de la ONU, el país ye l'únicu del mundu que, a entamos del sieglu XXI, cumplía los dos criterios que, según la organización ecoloxista Fondu Mundial pa la Naturaleza, caractericen al desarrollu sostenible: desarrollu humanu altu (IDH de 0,8) y güelga ecolóxica sostenible (menor de 1,8 ha/p).
Culturalmente'l país pertenez a América Llatina. Ye un país multiétnicu con una población, cultura y vezos derivados del amiestu de la herencia de los aboríxenes taíno, los españoles, los esclavos africanos trayíos pa trabayar nes plantaciones y la estrecha rellación cola Xunión Soviética demientres la Guerra Fría.
- ↑ URL de la referencia: https://www.interpol.int/Member-countries/World. Editorial: Interpol. Data de consulta: 7 avientu 2017.
- ↑ URL de la referencia: https://www.opcw.org/about-opcw/member-states/. Editorial: Organización pa la Prohibición d'Armes Químiques. Data de consulta: 7 avientu 2017.
- ↑ URL de la referencia: https://www.iho.int/srv1/index.php?option=com_wrapper&view=wrapper&Itemid=452&lang=en. Editorial: Organización Hidrográfica Internacional. Data de consulta: 8 avientu 2017.
- ↑ URL de la referencia: http://www.unesco.org/eri/cp/ListeMS_Indicators.asp.
- ↑ URL de la referencia: http://www.upu.int/en/the-upu/member-countries.html. Data de consulta: 4 mayu 2019.
- ↑ URL de la referencia: https://www.itu.int/online/mm/scripts/gensel8. Data de consulta: 4 mayu 2019.
- ↑ URL de la referencia: http://icdo.org/who-we-are/members/member-states.html. Data de consulta: 11 mayu 2020.
- ↑ URL de la referencia: https://public.wmo.int/en/members/cuba. Data de consulta: 26 mayu 2020.
- ↑ URL de la referencia: https://www.who.int/choice/demography/by_country/en/. Data de consulta: 21 xunetu 2020.
- ↑ URL de la referencia: https://www.wcoomd.org/-/media/wco/public/global/pdf/about-us/wco-members/list-of-members-with-membership-date.pdf. Data de consulta: 16 marzu 2024. Páxina: 2. Supports qualifier: data de principiu.
- ↑ 11,0 11,1 (2010) Cartafueyos Normativos. Nomes de los países del mundu y de les sos capitales y xentilicios. Uviéu: Academia de la Llingua Asturiana. ISBN 978-84-8168-500-8.