Breizh

Ar pennad-se zo diwar-benn ar vro istorel e gwalarn Europa. Evit ar rannvro melestradurel gall, sellet Rannvro Breizh.

Breizh
Ger-stur Kentoc’h mervel eget bezañ saotret
Kan broadel Bro gozh ma zadoù
Kêr-benn	Naoned (istorel) Roazhon (melestradurel)
Yezhoù	Brezhoneg Gallaoueg Galleg
Melestradur
Prezidant	Loïg Chesnais-Girard
Departamantoù	Aodoù-an-Arvor (22) Il-ha-Gwilen (35) Liger-Atlantel (44, istorel) Mor-Bihan (56) Penn-ar-Bed (29)
Arondisamantoù	15
Kantonioù	201
Kumunioù	1 268
Douaroniezh
Gorread	34 023 km² (istorel) 27 208 km²(melestradurel)
Poblañs (2016)	4 687 381 (istorel) 3 306 529 (melestradurel)
Stankted	138 ann./km² (istorel) 122 ann./km² (melestradurel)

Breizh ([bʁɛjs] (selaou ) pe [bʁɛx]), e gallaoueg : Bertaèyn [bəʁtaɛɲ]) zo ur vro geltiek, ul ledenez hag un takad sevenadurel e kornôg Europa, savet war lodenn gornôg ar pezh a oa Arvorig gwezhall. Ur vroad eo ivez abaoe an IX^vet kantved, pa oa unanet gant Nevenoe, he roue kentañ. Bretoned a vez graet eus he fobl.

Dizalc'h eo bet Stad Breizh betek ar XVI^vet kantved a-raok bezañ enframmet e rouantelezh Bro-C'hall da-heul koll arme Breizh a-enep an arme c'hall en emgann Sant-Albin-an-Hiliber e 1488. Emren eo chomet Breizh betek dibenn an XVIII^vet kantved a-raok bezañ dispennet ha divodet gant an Dispac'h gall a grouas an departamantoù.

Abaoe krouidigezh ar rannvroioù e Frañs en eil hanterenn an XX^vet kantved ez eus bet savet en-dro ur gwirvoud melestradurel da Vreizh, evit an daou drederenn eus he foblañs.

Ul ledenez vras eo Breizh, lec'hiet e kornôg Europa, etre Bro-C'hall hag an inizi breizhveuriat. War un tiriad strategel emañ, etre Mor Breizh hag ar Meurvor Atlantel, adal da gevandir Amerika. Un hin veurvorel he deus, neuze e vez dous ha gleb he goañvioù ha fresk he hañvioù daoust da vezañ tommoc'h gant tommadur an hin en XXI^vet kantved.