Especie

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

En biolochía, una especie (d'o latín species) ye una d'as unidaz basicas d'a biodiversidat. Per un regular, una especie ye constetuita d'organismos individuals d'una población natural, con:

• Capacidat ta cobrir-se entre ellos y reproducir-se, librando nuevos individuos fértils.
• Aspecto fisico, caracteristicas y chenoma similars, pos tienen ancestros comuns en tiempos relativament recients.

D'antes no se determine si diferents individuos perteneixen a la mesma especie, cal estudiar-los ta poder unificar-ne os rasgos a considerar. Anque bi ha diferents definicions d'especie, huei a separación d'entre especies ye prou bien definita, a tamas d'a linia separadera d'especies y subespecies que ye mes deficil de determinar concluyentement. As especies s'agrupan en cheneros, familias, órdens..., d'alcuerdo con o suyo parentache filochenetico.

En a clasificación cientifica, cada especie tiene un nombre binominal; o primero ye especificar-ne o chenero y dimpués a especie, anque, ta identificar-la s'han de mentar es dos nombre chuntos, per un regular escritos en corsiva (perque son en latín) y subrayatos cuan son escritos a man. Asinas, os humanos somos una especie d'o chenero Homo, dita Homo sapiens. Esta nomenclatura fue standardizada per Carl von Linné en o sieglo XVIII y a sobén s'en diz "nomenclatura linneguana". Mes formalment, o nombre especifico se gosa escribir con o suyo descubridor u descriptor acompanyando-lo, chunto con l'anyo en que ne facioron a primer descripción.