Fiktion

Fikzioon (lat. fictio, „Gstaltig“, „Personifikazioon“, „Erdichig“ vo fingere „gstalte“, „forme“, „sich usdänke“) bezäichnet d Schaffig von ere äigene Wält dur Litratuur, Film, Moolerei oder anderi Forme vo dr Daarstellig und dr Umgang mit sonere Wält. Bi dr Fikzioon handlet es sich um e bedütendi Kulturtechnik, wo in vile Beriich vo dr Kunst zum Iisatz chunnt.

Zum erklääre, was Fikzioon isch, wiist mä in dr Litratur- und Kunsttheorii under anderem druf hii, ass bi dr Fikzioon dr Aaspruch uf Woored feeli und ass es kä Überiistimmig mit dr Realidäät gääb. Es git vili underschidligi Aasetz, zum dr Begriff z erkläre, aber e Theorii vo dr Fikzioon, wo allgemäin akzeptiert isch, git s bis hüte nit.