Semantik

Semantik (vo griechisch σημαίνειν sēmaínein, ‚bezäichne‘, ‚zum Zäichen ghööre‘), au Bedütigsleer, isch dr Naame vo dr Theorii oder Wüsseschaft vo dr Bedütig vo de Zäiche. Zäiche chönne in däm Fall Wörter, Fraase oder Symbol si. D Semantik beschäftigt sich tüpischerwiis mit de Beziejige zwüsche de Zäiche und de Bedütige vo dene Zäiche.

Wenn sich d Semantik mit Zäiche vo alle Arte befasst, isch si e Däilberiich vo dr Semiotik. Wenn si sich nume mit sproochlige Zäiche befasst, isch si e Däildisziplin vo dr Linguistik.