Die Perser

D Perser (altgriech. Πέρσαι Persai) si äini vo de groosse Dragöödie vom griechische Dichder Aischylos. Si isch im Joor 472 v. d. Z. urufgfüert worde und gälte as s eltiste Drama, wo erhalte isch, uf dr ganze Wält. D Perser behandle dr Undergang vo dr persische Flotte in dr Seeschlacht vo Salamis us dr fiktive Sicht vom persische Köönigshoof.

„D Perser“ basiere uf dr historische Niiderlaag vom persische Groosskönig Xerxes I. in dr Schlacht vo Salamis im Joor 480 v. d. Z., wo dr Aischylos sälber uf eme griechische Schiff mitkämpft het. Bi de Dionysie het s Wärk dr erst Briis überchoo. Zämme mit de Dragöödie Phineus und Glaukos Potnieus, wo verlooregange si, und em Satyrspiil Prometheus Pyrkaios het s e Tetralogii bildet.

Au wenn in dr Dragödie dr Stolz über e Siig Usdruck findet, wird doch dr Find nid aabegmacht. Im Stück wird s Schiggsaal vom draagische Held Xerxes nid bestimmt dur daas, was er sälber macht, sondern d Götter, wo wüetig si über d Hybris und d Schändig vo Häiligdümer, entschäide drüber.