Gesellschaft (Soziologie)

Dä Artikel behandlet dr soziologisch Begriff vo dr Gsellschaft. Für anderi Bedütige vom Begriff lueg doo.

Gsellschaft bezäichnet in dr Soziologii und de anthropologische Wüsseschafte allgemäin en abgränzti Zaal vo Persone, wo dur underschidligi Merkmol zämmegfasst wärde und wo as soziali Gschöpf (Aktöör) mitenand verchnüpft lääbe und diräkt oder indiräkt sozial interagiere.

Dr Begriff Gsellschaft beziet sich uf d Menschhäit as Ganzes (gegenüber de Dier und de Pflanze), und au uf bestimmti Grubbe vo Mensche, zum Bischbil uf e Volk oder en Ethnii.

Dr Begriff Gsellschaft cha sich aber au uf e Zämmehang zwüsche Mensche bezie, wo rüümlig abgränzt und strukturiert isch (zum Bischbil „die schwedischi Gsellschaft“), oder uf e Chnöiel (cluster) im soziale Netzwärk vo dr Menschhäit, wo mä dur d Netzwärkdichdi und d Multiplexidäät vo de Interakzione cha abgränze.

In de aktuelle Sozialwüsseschafte wird d Bezäichnig innerwüsseschaftlig vilmol mit ere ungnaue Bedütig verwändet.