Justinian I.

Justinian I.
Kaiser vom Byzantinische Riich
Regierigsziit	1. August 527 – 13/14 Novämber 565
Name	Flavius Petrus Sabbatius Iustinianus Augustus
Uf d Wält cho	öbbe 482
Geburtsort	Tauresium, Dardanie (in dr Nööchi vom hütige Skopje, Mazedonie
Gstorbe	14. Novämber 565
Dodesort	Konstantinopel
Begrabe	Apostelchille z Konstantinopel
Vorgänger	Justin I.
Nochfolger	Justin II.
Verhürotet mit	Theodora

Dr Flavius Petrus Sabbatius Iustinianus (altgriech. Ἰουστινιανός; * um 482 z Tauresium bi Justiniana Prima; † 14. Novämber 565 z Konstantinopel), besser bekannt as Justinian,^[1] isch vom 1. August 527 bis zu sim Dood im Joor 565 römische Kaiser gsi. In e baar Kwelle und in dr eltere Liddratuur wird er do und dört au as Justinian dr Grooss bezäichnet; die orthodoxe Chille vereeren en as Häilige.

Dr Justinian gältet as äine vo de bedütendste Herrscher in dr Spootantike. Si Regierigszit isch e wichdigi Stuefe im Übergang vo dr Antike zum Middelalter und im Übergang vo dr römische Dradizioon zur byzantinische. Dr Justinian het en aggressivi Westpolitik bedriibe, und es isch em glunge, witi Däil vom alte Imperium Romanum, wo im Westen im Lauf vo dr Völkerwanderig an d Germane gfalle zruggzeroobere. Für d Rächtsgschicht isch d Kompilation römische Rächt, won er in Ufdraag gee het und wo män em spööter Corpus Iuris Civilis gsäit het, vo groosser Bedütig.

529 het dr Justinian die platonischi Akademii z Athen zuedoo, 542 het er s altrömische Amt vom Konsul, villicht us Gäldgründ, faktisch abgschafft. D Sakralisierig vom Kaiserdum isch immer sterker worde und het die letschte Räst vo dr Illusion zerstöört, wo s Prinzipat füüre brocht het, ass dr Kaiser nume e primus inter pares sig.

Dr Gschichtsschriiber Prokopios von Caesarea, wo d Wärk von em die wichdigsti Kwelle für d Zit vom Justinian si, het im Kaiser si Politik stark kritisiert. Witeri Informazioone stamme under anderem vom Johannes Malalas, Agathias und Menander Protektor.

1. ↑ Wäärend Althistoriker im Allgemäine nume vo "Justinian" reede, isch s in dr Byzantinistik üüblig, in as "Justinian I." z bezäichne: Es het zwar nume äi "römische" Kaiser mit däm Naame gee, aber zwäi "byzantinischi".