Ernest Rutherford

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Ernest Rutherford
Ernest Rutherford
Información personal
Calendata de naixencia	30 d'agosto de 1871
Puesto de naixencia	Brightwater (Nueva Zelanda)
Calendata de muerte	19 d'octubre de 1937
Puesto de muerte	Cambridge (Anglaterra, Reino Uniu)
Ocupación	Fisico y quimico

Ernest Rutherford, naixito de Brightwater (Nueva Zelanda) o 30 d'agosto de 1871 y muerto en Cambridge (Cambridgeshire, Anglaterra, Reino Uniu) o 19 d'octubre de 1937, estió un fisico y quimico neozelandés, considerato o pai d'a Fisica nucleyar. Estió o descubridor d'as particlas alfa y d'as particlas beta; descobrió tamién que a radioactividat incluye a desintegración d'os elementos quimicos, recebiendo asinas un Premio Nobel de Quimica en 1908. Tamién estió Rutherford qui almostró a existencia d'un nuclio atomico, en o cual se concentra a carga positiva y a mayor parte d'a masa de l'atomo, y qui logró a primera transmutación artificial.

Si mientres a mayor parte d'a suya vida Rutherford se dedicó cuasi esclusivament a la investigación, a segunda mitad d'a suya vida se dedicó a ensenyar y a dirichir o laboratorio Cavendish en Cambridge, a on se descubrió o neutrón y a on se formoron os fisicos Niels Bohr y Robert Oppenheimer. Asinas, a suya figura tien una gran importancia en o campo d'a Fisica nucleyar.

Rutherford estió president d'a Royal Society (1925-1930), y en 1922 recibió a Medalla Copley. Tamién estió miembro de l'Academia Pontificia de Ciencias.