Escama

Una escama^[1] (d'o latín <squama) ye una plancha chiqueta y dura que creixe sobre a piel d'un animal, por un regular pa brindar-le aislamiento y protección. Entre os grans linaches d'animals en i hai a saber-los que en tienen, pos as escamas han evolucionau diversas veces en o que ye un eixemplo platero de converchencia evolutiva.

Se considera que as escamas son una condición ancestral que teneban os antepasaus d'os amniotas y que se relacionan con que podesen fer una vida mas independient de l'augua, pos os animals con tegumento cubierto d'ellas resultan mas resistents contra o sequero que os anfibios. En 2016, un estudio d'a Universidat de Chinebra y o Instituto Suizo de Bioinformatica contrimostró que os pelos, as plumas y as escamas d'os reptils medran a partir d'un mesmo tipo d'estructura embrionaria que se diz placoda. Por lo tanto, as escamas, as plumas y os pelos d'os vertebraus son estructuras homologas.^[2]

1. ↑ (an) Diccionario aragonés-castellano-catalán. Versión preliminar. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.
2. ↑ (es) Sobre el origen de escamas, pelos y plumas, consultau o 2 de marzo de 2024.