Selva

Ta atros emplegos se veiga Selva (desambigación).

Una selva^[1][2] (d'o latín < silva) u bosque^[1] (d'o franco busk a traviés de l'occitán bosc) ye una superficie con una gran densidat d'árbols. En realidat, existen a-saber-las definicions de selva.^[3] Ditas comunidaz de plantas cubren grans arias d'a Tierra y funcionan como habitats pa animals, moduladors de fluxos hidrolochicos y conservadors d'o suelo. Actualment, as selvas ocupan, alto u baixo, o 30% d'a superficie d'a Tierra, encara que son reblando en as zagueras decadas por a creixent explotación forestal, como ye o caso en l'Amazonia d'o Brasil.

A sobén, se diferencia entre una selva natural u selva primaria y una selva artificial u selva antropizada, en considerando que a selva natural ye libre d'as influencias humanas, mientres que a segunda ye mesmo modelada por l'acción de l'hombre. Sindembargo, cal parar cuenta en que ista diferencia ye muit poco realista, y mas en Europa, a on o estau actual d'as selvas ye consecuencia d'una actividat humana de sieglos en as selvas. Puet estar que en Europa os zaguers monts con selvas primarias se troben en bellas rechions montanyosas d'Eslovaquia; bellos eixemplos de selvas naturals en atros lugars d'o mundo son l'Amazonia en Brasil, bosques tropicals en as marguins d'o río Congo en Africa u bellos bosques boreals en o Canadá.

1. ↑ ^{1,0 1,1} (an) Diccionario aragonés-castellano-catalán. Versión preliminar. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.
2. ↑ (an) Silbia Garcés Lardiés y Francho Rodés Orquín: Un borguil de parolas.Bocabulario dialeutal escolar, Gubierno d'Aragón, 2006, ISBN 84-689-7358-0, p.46.
3. ↑ H. Gyde Lund (coord.): Definitions of Forest, Deforestation, Afforestation, and Reforestation. Gainesville, VA: Forest Information Services, 2006.