Villa

Una villa^[1] ye un nuclio de población de cualque entidat, por causas economicas (mercato, por eixemplo, u abundancia de comercios), sociopoliticas (capital d'una comarca u subcomarca u, antigament, d'una sinyoría), relichiosas (capital d'un bispato u d'un centro relichioso important), culturals, historicas...^[2]

Se tracta d'una población que ha recibito a lo largo d'a historia cualques reconoiximientos explicitos, como determinatos privilechios (por eixemplo, lo de celebrar ferias u mercatos) de l'autoridat reconoixita, pero que, por razons diversas, tampoco no li ha estata concedita la categoría superior, la de ciudat. En bels casos existen documentos antigos, mas que mas medievals y d'a Edat Moderna, que la categorizan como villa; en atros casos ye o mesmo uso, derivato d'o costumbre popular, que l'ha considerata siempre como villa por a suya importancia adintro d'a suya redolada.

1. ↑ (an) Diccionario aragonés-castellano-catalán. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.
2. ↑ (es) Francho Nagore Laín: Vocabulario de la Crónica de San Juan de la Peña (versión aragonesa, s. XIV), Universidat de Zaragoza, 2021, ISBN 978-84-1340-315-1, p.462